Ноябрь 13 – бүгү делегейниң караа көрбес кижилерниң хүнү
Үш дакпыр байырлал
Бөгүн, ноябрь 13 – бүгү делегейниң караа көрбес кижилерниң хүнү.
Республиканың Караа көрбестер болгаш көөрү кошкак кижилерниң ниитилелдиң бо хүнде байдалы-биле “Тывамедиагрупптуң” корреспондентизи таныжып четкенин @tmgnews17 дыңнадып тур.
Бөгүн Кызыл хоорайда Караа көрбестер ниитилелиниң оран-савазы мурнунда чылдарда ышкаш байырланчыг эвес-даа болза, ниитилелдиң каш кежигүннери Геннадий Монгуш, Аңгыр Хертек, Зинаида Монгуш олар “Күскү сесерликте” деп ырыны ырлажып эш-өөрүнге онлайн байыр чедирип турар болду.
Бо чылын үш дакпыр байырлалдарда белеткенип турар дээрзин ниитилелдиң даргазы Аңгыр Хертек дыңнатты. Ол дээрге Тыва Республиканың караа көрбестер ниитилелиниң 60 чылы, Бүгү Россияның караа көрбестер ниитилелилинң 95 чылдааны база Тываның Караа көрбестер ниитилелиниң бүдүрүлгезиниң 50 чыл ою-дур. Республикада караа көрбес база карааның көөрү багай кижилер саны - 800, а Кызыл хоорайда 250 кижи бар. Ниитилелдиң кежигүннери хамчык аарыгның хайындан ооң мурнунда чылдарда ышкаш чыглып алгаш, клувунга байырлаары болдунмас, ынчангаш шупту хемчеглерин онлайн чурумга эрттирип турар болдулар.
“Үш дакпыр байырлалывысты декабрь 3-те клубка демдеглээр бис. Ол хүн чүгле ниитилелдиң баштаар чериниң кежигүннери, активчилер, чалаан аалчылар кээр. Эвээш кижи составтыг, дистанцияны сагып тургаш эрттирер бис. Байырлал мурнунда инвалидтер аразынга онлайн ыры, шүлүк мөөрейин чарлаар бис. Ол ышкаш аргаан-дараан делгелгени база брайл бижик билир киржикчилер аразынга чогаадыг бижиирин организастаар. Кожууннарда инвалидтер-биле ажылдап турар даргалар кожууннарында бар инвалид хамаатыларынга мөөрейлерге киржири-биле дузалажырын дилеп тур бис” – деп, Аңгыр Байырович чугаалады.
Кызыл хоорайның Караа көрбестер ниитилелиниң даргазы Геннадий Монгуш эш-өөрүнге байыр чедирген чылыг-чымчак сөстерни илереткеш, ниитилелдиң эрттирип турар бүгү хемчеглеринге идепкейлиг киржип, үргүлчү харылзажып чоруурун кыйгырган.
Тыва Республиканың караа көрбестер болгаш көөрү кошкак улуска тускайлаттынган ном саңы база ол-ла чаңгыс оран-савада турар. Бөгүн ном саңының коллективи Караа хөрбестер хүнүнде номчукчуларынга улуг белекти сөңнеп турар. Ол дээрге чаа номнуң онлайн таныштырыглазы-дыр. Ооң дугайында Тываның библиотекарьлар ассоциациязының даргазы, Караа көрбес болгаш көөрү багай кижилерниң тускайлаттынган ном саңының директору Аида Дагба дыңнатты: “Эрткен чылын ТР-ниң Күш-ажыл болгаш социал политика яамызы “Тыва иштинге инвотуристерге тайылбыр дептер” деп төлевилеливисти деткээн. Яамының берген 108 муң рубль деткимчези-биле санныг видеокамера, ном парлаар тускай саазыннар садып алган бис. Тываның дугайында карааның көөрү кошкак болгаш дыңнавас туристерге тускайлаттынган видео альбомнуг, брайл бижиктиг номну боттарывыстың күжүвүс-биле үндүрүп алганывыс бо”.
Маңган ак номда Тываның онзагай черлерин, бойдузун, харын-даа картазын брайл бижикке парлааны онзагай. Ону дөстегер үжүктерлиг кылдыр тускай саазында парлаан. Аңаа немей видео альбом база бар, ында ол бүгүнү чугаалап, номчуп турар. Номну тускай Брайл-принтерге парлаан. Бо бүгү ажылды ном саңының директору Аида Дагба баштаан ажылдакчылар Анай-Хаак Базыр, Чойгана Донгак, Урана Ооржак, Аяна Молдурушку олар кылган.
200 кезек брайл номнар болгаш дискилерни республиканың 173 библиотекаларынга үлээр. Библиотекарьларның бо ажылы караа көрбес кижилерге езулуг улуг белек болган.
Амыр эвес салымга таварышкан инвалид кижилерниң амыдарылынга деткимче бээри улуг буян.
#Караакөрбестер #Ниитилел #Тускайлаттынганномсаңы #Байырлал #ТМГмедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews