Үнүм ам-даа чаңгыланзын
«Үнүм ам-даа чаңгыланзын» деп чогаалчы, прозачы, шүлүкчү Юрий Шойдакович Кюнзегештиң 95 харлаанынга литературлуг шакты бөгүн, ноябрь 16-да караа көрбес улустуң клувунга библиотека ажылдакчылары эртирген.
А. Даржай чогаалчыны «Ю. Кюнзегеш – диригжидилгениң тулган мастери» деп үнелээр чораан, ооң ынчаар үнелээни кончуг шын.
Тыва шүлүк чогаалының бүгү-ле чаартылгалары Ю. Кюнзегештиң бийириниң бажындан ширбиттинип тыва поэзияның агымынче эштип кирип турар.
Ю. Ш. Кюнзегештиң – тыва сонеттиң эге кокпазын изеп үндүрген шүлүкчү. Ол оон аңгыда амгы үениң Тывазының эң-не улуг сураглыг, билдингир шүлүкчүзү.
Ю.Ш. Кюнзегеш тыва шγлγк чогаалынга делегей поэзияның алдаржаан шγлγк хевири сонетти, балладаны, ожук даштарын, эпитафияны (орнукшудулга мѳргүлдерин) бир дугаар γлегерлеп ажыглаан шγлγкчγлернин бирээзи болур.
Литературлуг шакта Ю. Кюнзегештиң сонеттерин, ожук-даштары деп адаар үштээн база дөртээн шүлүктерин номчукчулар улуг сонуургал-биле дыңнаан. Оон аңгыда шүлүкчүнүң ырылар кылдыр хуула берген шүлүктерин база сактып чугаалашканнар.