Июль 24-те Тыванын бирги Президентизи (1992-2002) Шериг-оол Дизижикович Ооржак 80 харлаан.
Шериг-оол Дизижик оглу Ооржак (орус. Шериг-оол Дизижикович Ооржак) — Тыва Республиканың Президентизи (1992-2002 чылдарда), Тыва Республиканың Чазак даргазы (2002-2007), Россия Федерациязының Федералдыг Хуралынының Федерация Чөвүлелиниң кежигүнү - сенатор, Европа Чөвүлелиниң ассамблеязының парламентизиниң кежигүнү.
1942 чылдың июль 24-те Барыын-Хемчик кожууннуң Шекпээр суурунга төрүттүнген. Ачазы 32 харлыг тургаш, чок апарган. Авазы чеди ажы-төлүн чааскаан өстүргеш, эртем-билиглиг кижилер кылдыр кижизидип каан.
1971 чылда Москваның Тимирязев аттыг Көдээ ажыл-агый академиязын кызыл диплом-биле дооскан.
1971-1980 чылдарда "Шекпээр" совхозтуң экономизинге, ооң соонда директорунга ажылдаан.
1980-1983 чылдарда Барыын-Хемчик кожууннуң даргазы. 1985 чылда Новосибирск хоорайның партияның өөредиг чериниң доозукчузу. 1986 чылдан - Тыва обкомга секретарьлап ажылдап эгелээн.
Тываның дээди хуралынче үш кыйгырыг түңнелинче кирип турган. 1990 чылда улусчу депутат кылдыр шилиттирген. 1990—1992 чч. — Тыва АССР-ниң сайыттар хуралының даргазы. 1991 чылдың августка дээр СЭКП-ниң кежигүнү.
1992 чылдың март 15-те Тыва Республиканың баштайгы Президентизин альтернативтиг байдалга соңгуп турда, Ооржак Шериг-оол Дизижикович оралакчы Президентиге кордакчы Мельников А.А-биле тиилелгени чедип алган. 1997 чылда эрткен Президент соңгулдазынга ийиги хуусаага арткан.
2002 чылда ТР-ниң Чазааның Даргазының соңгулдаларынга бүзүрелдиг тиилелгени база катап чаалап алгаш, республиканы улаштыр баштаан.
Ооржак Ш.Д. Россия Федерациязында экономиктиг, политиктиг өскерилгелер кидин-түлүк чоруп турда, кончуг нарын үеде Тываны баштай берген. Экономиктиг реформалар канчаар-даа аажок берге байдалдарда эртип турбуже, Тыва саң-хөө талазы-биле боду бодун хандыртынар сорулганы алгаш, ажылдап турган. Ол ажылдар Ооржактың соонда, ам-даа уламчылавышаан.
2007 чылдың апрель 6-да Шериг-оол Дизижикович Ооржак республиканың чазак даргазының албан-дужаалын салган.